Tyson mitagna duguon nga away batok Jones
CEBU, Philippines — Gibaraw na sab ni 'Iron' Mike Tyson (50-6, 44KOs) ang mga kritisismo nga ang umaabot nilang away ni Roy Jones, Jr. (66-9, 47KOs) dili tinuoray ug usa lamang ka pasundayag.
Ang duha ka heavyweight boxing legends gikatakda nga mag-abot sa walo ka hugna nga exhibition bout karong Domingo didto sa Staples Center sa Los Angeles, California.
Ang 54-anyos nga si Tyson misaad nga dili siya mopakita og bisan gamay nga timailhan sa boksidor nga gipaundang ni Kevin McBride sa ikapitong hugna sa katapusan niyang away niadtong Hunyo 11, 2005 didto sa MCI Center sa Washington. Gani si Tyson nangagpas sa usa ka huego-todo ug duguon nga engkuwentro batok sa 51-anyos nga si Jones.
Si Tyson naghari kanhi isip labing bata nga world heavyweight champion sa edad nga 20-anyos, apan si Jones nga usa ka four-division world champion nagkupot sab og rekord isip bugtong boksidor nga nag-debut sa middleweight ug nakampiyon sa heavyweight division. Wala hinuo'y opisyal nga mananaog nga ideklarar gumikan kay wala may mga judges gikan sa California State Athletic Commission nga motrabaho sa sangka nilang Tyson ug Jones.
- Latest
