Team ADR mopasiugda'g virtual bike challenge

CEBU, Philippines — Ang mga beterano ug bag-o pa lamang naungo pagsikad og bisikleta dunay angay nga pagalantawon sa unahan gumikan kay ang Team ADR (Any Day Runners) mopahigayon og usa ka bulan nga Virtual Bike Challenge karong Oktubre 15 ngadto sa Nobiyembre 15.

Matud pa ni Jez Ramos sa Team ADR nga kadtong gustong mosalmot sa ilang kalihukan nga abli sa mga seklista nga nag-edad og 18-anyos pataas sa tibuok nasud, dunay tulo ka distansiya nga pagapilian, ang 200km, 400km ug 600km.

Kon unsa man gani nga kategoriya ang ilang pilion kinahanglan ilang humanon sud sa usa ka bulan. Ang mga partisipante giawhag nga  mo-post sa ilang mga kalihukan sa cycling ug ipakita kon pila na'y distansiya ang ilang nahuman.

Kadtong makakumpleto sa challenge makadawat og medalya,  souvenir shirt ug e-certificate.

Ang registration fee nagkantidad og P600. Alang sa dugang mga detalye, mahimong mokontak ni Jez Ramos (0917-6328474) ug Dwight Velasco o dili ba bisitaha ang ilang Facebook page (Team ADR's Virtual Bike Challenge).