Beermen andam modepensa bisan wala si Fajardo

CEBU, Philippines — Matud pa ni SMB coach Leo Austria nga dili pa gihapon makaduwa ang ilang alas sa pagsugod og balik sa Philippine Cup sunod bulan diin sila maoy defending champion.

Pito na ka bulan ang milabay sukad ang six-time PBA MVP nga garbo sa Pinamungajan, Cebu na-injured, apan wala pa siya hatagi og pagtugot sa iyang doktor nga makaduwa gumikan kay nagpadayon pa ang iyang rehabilitasyon

Gawas niini, wala sab makaapil bisan kausa ang 30-anyos nga si Fajardo sa mga workout sa Beermen didto sa ilang pasilidad sa Acropolis gym.

Bisan og wala ang 6-foot-9 nilang higante, si Austria mipadayag sa ilang kaandam nga modepensa sa ilang titulo.

Sa pagbalik sa aksiyon sa PBA sud sa Clark bubble sunod bulan, dad-on sa Beermen ang 1-0 record human ilang gipilde ang Magnolia Hotshots, 94-78 sa bugtong duwa sa liga sa wala pa kini mahunong niadtong Marso tungod sa pag-ulbo sa kalibutanong pandemiya.