Al Solis labing hingigo sud sa korte

CEBU, Philippines — Sa mabulukon niyang karera sa PBA, si Al Solis mahinumduman isip labing hingigo sud sa korte.

Timaan niini, si Solis apil sa eksklusibong grupo sa mga PBA players nga nakaigo og dili momenos 1,000 ka 3-point shots sa ilang pagkisaw sa labing unang propesyonal nga liga sa Asya.

Apan ang wala mahibaw-i sa kadaghanan, dili kinaham ni Solis ang outside shooting sa dihang nagduwa pa siya sa kolehiyo uban sa University of the Visayas (UV) Green Lancers sa Cebu Collegiate Athletic Association (CCAA)  nga mao na karon ang CESAFI, niadtong naghinapos nga bahin sa dekada 70s hangtod niadtong 1984.

Ang 57-anyos nga si Solis mipadayag niining maong rebelasyon atol sa iyang paglugwa sa The Link podcast sa beteranong sportswriter nga si Rey Joble niadtong Miyerkules nga gitaho sa PBA.ph.

"Si Boy Cabahug talaga ang shooter namin, ako slasher. Ang laro ko court-to-court, fastbreak at open court. Pag binigyan ako ng one step opening, lay-up na yan," matud pa ni Solis diin ang gipasabot si Elmer "Boy" Cabahug, ang bantugan niyang kauban sa UV Lancers diin sila nakadaog og National Inter-Collegiate title ug nahimong sakop sa RP Youth team nga naka-bronze medal niadtong 1984 ABC Under 19 tournament didto sa Seoul, South Korea.

Isip usa ka talentadong magduduwa, dali ra nga nakat-onan ni Solis ang pagbugha sa iyang mga itsa sa 3-point area nga nahimo niyang labing hait nga hinagiban sa pagdaog og unom ka kampiyonato, pagka-apil sa All-Star usa ka higayon ug pagsakop sa Mythical First Five selection duha ka higayon sa 14 ka tuig niyang pagduwa sa PBA sul-ot ang uniporme sa Formula Shell, Purefoods TJ Hotdogs, Swift/Sunkist, Pepsi/Mobiline ug Batang Red Bull Thunder.