Duha ka pro basketball leagues motumaw

CEBU, Philippines — Adunay duha ka bag-ong propesyonal nga liga nga mohimo og kasikas sa Philippine basketball.

Kini human giaprubahan sa Games and Amusements Board (GAB) ang aplikasyon sa National Basketball League (NBL) ug Women’s National Basketball League (WNBL) aron mahimong propesyonal. Opisyal kining gipahibawo ni GAB chairman Baham Mitra atol sa usa ka virtual press conference niadtong Miyerkules sa hapon uban ang mga kadagkoan sa NBL nga gipangulohan sa tsirman niining si Celso ‘Soy’ Mercado, executive vice president Rhose Montreal ug commissioner Edward Aquino.

“Gaya ng pinangako namin sa inyo nung nagsimula tayo, eto ang simula ng ating pagpitas ng bunga,” matud pa ni Mercado. “Ang ating liga ay masasabi natin na napakagandang liga dahil klaro ang ating konsepto. Eto ang tinatawag na tunay na homegrown. Ako ay naniniwala na ang ating paglipat going to professional ay napakalaking bahagi hindi lamang sa NBL kundi sa mga mahuhusay na manlalaro na hanggang ngayon ay hindi pa nabibigyan ng pagkakataon sa mga sulok sulok ng ating bansa.”

Ang NBL maoy labing unang propesyonal nga liga sa nasud nga mohatag og pagtagad sa mga talento sa tagsa-tagsa ka mga probinsiya, siyudad ug lungsod nga ilang girepresentahan.

Una kining gibuhat sa Metropolitan Basketball Association (MBA) niadtong 1999, apan wala makalahutay ug nabungkag niadtong 2002.

Samtang ang WNBL maoy labing unang prospeyonal nga liga alang sa mga babayeng basketbolista nga na-establisar sa Pilipinas.

“Basketball is not just only for males. The NBL is also advocating gender equality. Kung may panlalaki, meron ding pambabae,” daosn pa ni Mitra. Sa kinatibuk-an, ang NBL ug WNBL maoy ikatulong pro basketball league sa nasud sunod sa PBA.