ALA gym naghulma mga kampiyon sa kinabuhi

CEBU, Philippines — Sud sa 35 ka tuig, dili malalis nga ang ALA Boxing nagbilin og dili mapapas nga marka sa paugnat sa kusog sa Pilipinas.

Gawas sa pagtabang sa mga pobreng boksidor aron makab-ot ang ilang damgo, ang ALA sab maoy responsabli pagpahigayon og makasaysayanon, world-class ug makalingaw nga mga pasundayag, apil na niini ang Pinoy Pride series nga naabot pa gani sa langyaw'ng lapyahan didto sa Dubai ug Amerika.

Apan sa tanan niining mga kadungganan, dunay usa misidlak nga labing hayag.

Ang ALA naghulma og mga kampiyon dili lamang sa boksing, apan hasta sab sa kinabuhi.

Kini gumikan kay si Antonio 'Bidoy' Lopez Aldeguer, ang gitamod nga "Godfather of Cebu boxing" nga maoy nagtukod sa ALA Gym niadtong 1985, naglantaw sa ugma sa iyang mga boksidor. Labing una sa iyang huna-huna mao ang paghatag kanila og maayong kinabuhi kon maabot na ang panahon nga ila nang isab-it ang ilang gloves. Mao nang dili na ikatingala nganong panganod sa kagul-anan maoy mihabol sa ALA Boys human nasayod nga nanirado na ang ALA Boxing gumikan sa nagpadayong pandemiya ug ingon man sa pagkasira sa ilang long-time TV partner nga ABS-CBN.

"That's life, nothing is permanent. Acceptance is the best to move on," matud pa ni Melindo nga ubos sa paggiya sa ALA Boxing nahimong IBF light flyweight champion niadtong 2016. "Sir ALA helps a lot of young children like me who dream to be part of ALA Promotions and improve the status of our family. I've been in ALA Boxing for 15 years and I am thankful to sir ALA who taking good care of me and always believing in my capability and ability. My loyalty is to sir ALA alone. I'm very thankful to be part of the 35 years of ALA Boxing. "Nagkanayon si Melindo, lumad gikan sa Cagayan de Oro City, nga daghan kaayo siya og nakat-onan nga mga leksiyon samtang anaa sa poder sa ALA  Gym.

Sama ni Melindo, ang kanhi niya stablemate nga si Rey 'Boom Boom' Bautista naguol sab nga wala na ang  ALA Gym.

"Sakit para nako nga nasirado ang ALA kay diha baya ko nahimong Boom Boom ug nailhan sa tibuok kalibotan. Diha ko naningkamot nga makabarog sa akong kaugalingon. Dako og natampo si sir ALA paghimo nako nga maayong mamayan sa katilingban. Natabangan ko ug nakat-on kon unsa sakto ug maayong buhaton," matud pa ni Bautista.Ang garbo sa Candijay, Bohol nakaaway kausa alang sa world title, apan napakyas human gitumba sa Mehikanong si Daniel Ponce de Leon sud lamang sa usa ka hugna niadtong Agosto 11, 2007 didto sa Arco Arena n Sacramento, California.

Bisan og nakasagunson og duha ka daog batok nilang Sergio Reyes ug Juan Jose Martinez Alvarez, ang 34-anyos nga si Bautista miretiro niadtong 2014 bitbit ang record nga 36 ka daog, 25 niini pinaagi sa knockout, ug tulo lamang ka pilde. Sakop na siya karon sa Philippine Army ug nagsilbeng training officer sa Philippine Military Academy (PMA) didto sa Baguio City.

Nagkanayon si Bautista nga dili niya mahikalimtan ang ALA gumikan kay tipik ug kabahin kini sa iyang kinabuhi ug naghatod kaniya kon asa ug unsa man gani ang iyang naabot karon.

"Gitudloan ko nga ang ALA dili lamang training ground sa boxing, apan hasta sab sa tinuod nga kinabuhi. Dili ko maingon ani karon kon dili pa tungod sa ALA. Nailhan ko ug nakahatag og maayong kinabuhi sa akong pamilya tungod sa ALA. Kon unsa man gani ko karon, tungod sa ALA ug kabahin na kini sa akong kinabuhi," dugang pa ni Bautista.