Stay at home chessffest "national" na

CEBU, Philippines — Human sa malampuson nga pagpahigayon sa miagi nilang lima  ka edisyon, ang Stay at Home Chess Challenge usa na karon ka nasudnong kompetisyon.

Kini human si International Master Kim Steven Yap sa Cebu School of Chess mipahibawo pinaagi sa ilang Facebook page kagahapon nga ang ikaunom nga edisyon sa binulan nilang torneyo nga giulohan og "The National" abli na sa tanang players tibuok nasud. Gikatakda kini karong Septiyembre 5 ug duwaon sa lichess.org ubos sa  Arena format sugod sa alas-5 sa hapon.

Miabot ngadto sa P33,000 nga ganting salapi ang iapud-apod sa mga mananaog diin ang top 5 sa open category mobulsa og P5,000, P4,000, P3,000, P2,000 ug P1,000. Ang top female ug kiddie (14-under) players makadawat og P1,000 nga insentibo matag usa.

Gawas niini, ang top 5 non-Cebuano players ug ang top 5 Cebuano placers moabante sa grand finals karong Disyembre 5.

Sa gihapon, dunay daghang raffle prizes alang sa mga partisipante ug fans nga manan-aw sa mga duwa nga makita pinaagi sa streaming sa Cebu School of Chess FB page.

Alang sa dugang detalye, kadtong mga interesado mahimong mokontak ni IM Kim Yap sa 0977-6864660 o m.me/kimsteven.yap. Mahimo sab nga direktang mobisita sa Cebu School of Chess FB page.

Way klaro away  nilang Inoue: Casimero modepensa na lang sa iyang titulo

Emmanuel B. Villaruel

CEBU, Philippines — Kay hanap pa sa dyes panas nga mahinayon ang away nilang Naoya Inoue, ang Pinoy'ng kampiyon nga si Johnriel "Cuardo Alas" Casimero modepensa na lang sa iyang WBO bantamweight title.  Si Casimero orihinal untang gikatakda nga makigsangka batok ni Inoue, ang WBA ug IBF bantamweight champion, sa usa ka unification bout didto sa Las Vegas, apan nadiskaril kini gumikan sa kalibutanong pandemiya.

Timaan nga wala na'y pag-asa nga madayon ang ilang sangka sa pagka karon, si Top Rank chairman Bob Arum nga maoy promoter ni Inoue milinya sa Australian No.1 contender nga si Jason Moloney aron maoy sunod nga kontra sa gibansagang "Monster" nga hapon.

Mao kini ang nakapaaghat ni MP Promotions President Sean Gibbons nga pagadepensaon na lang sab si Casimero sa iyang korona sa sunod niining pagkatkat sa ring nga tentatibong gikatakda karong Septiyembre 26 didto sa Mohegan Sun Casino and Resort sa Uncasville, Connecticut, segun sa taho ni Quinito Henson sa The Philippine STAR. Lagmit makontra ni Casimero mao si WBC No. 8 contender Alejandro Santiago nga nakatabla sa kababayan ni Casimero nga si IBF superfly weight champion Jerwin Ancajas sa ilang engkuwentro didto sa Oakland niadtong 2018.