Tyson mibahad tumbahon si Jones

CEBU, Philippines — Exhibition bout man lang tuod ang umaabot nilang away, apan seryoso kaayo si "Iron" Mike Tyson nga iyang tumbahon si Roy Jones Jr. sa walo ka hugna nilang sangka karong Septiyembre 12 didto sa Dignity Health Sports Park sa Carson, California. Ang 54-anyos nga si Tyson, kinsa nagkupot sa record isip labing bata nga heavyweight champion sa kasaysayan sa edad nga 20 anyos ug upat ka bulan niadtong 1986, nangandam sa iyang ring comeback batok sa 51-anyos nga si Jones, ang bugtong boksidor nga nag-pro sa junior middleweight ug nahimong heavyweight champion.

Sukwahi sa pamahayag ni California State Athletic Commission Executive Director Andy Foster nga mahug nga magbinanatay sa usa ka sparring lamang ang duha ka banggiitang mga boksidor, si Tyson nagkanayon nga tuyo niyang kastiguhon ug palukapahon si Jones.

“This is search and destroy! – I’m looking forward to recapturing my glory. If the opportunity comes, I’m always looking for it,” matud pa ni Tyson ngadto sa TMZ Sports.

Si Tyson, ang undisputed heavyweight champion gikan niadtong 1987 ngadto sa 1990, misalikway na sab sa mga kahadlok kabahin sa risgo sa pag-away sa ilang mga edad.

“We’re both professionals. We know how to handle ourselves and whatever happens, happens," dason pa ni Tyson. “The fighting game is what I’m about and hurting people is what I’m about.”

Si Tyson dunay 50-6 win-loss record uban ang 44 knockouts, samtang si Jones nagbitbit og 66-9 nga marka uban ang 47KOs.

Apan dili sama ni Jones nga miaway sa kanunay padung sa edad nga 50, si Tyson wala na makaaway pa sukad siya miretiro human gipilde ni Kevin McBride niadtong  2005.