Lowry bida sa Raptors

CEBU, Philippines — Mipatuasik og 33 puntos ug milangkat og 14 ka rebounds si Kyle Lowry aron pangulohan ang defending NBA champion Toronto Raptors ngadto sa 107-92 nga kadaogan batok sa Los Angeles Lakers sa NBA kagahapon didto sa Orlando, Florida.

Ang bitoon sa Lakers nga si LeBron James miiskor og 20 uban ang 10 ka rebounds, samtang ang sidekick niyang si Anthony Davis miposte og 20 puntos ug 14 ka rebounds, apan ang Lakers nakasinati sa labing bati nilang shooting ning season diin sila mipasud og 29 lamang sa 82 nila ka itsa.

Gisugdan sa Raptors ang duwa pinaagi sa 13-0 run. Mibawos hinuon dayon ang Lakers hinungdan nga nakasikit kini ngadto sa 21-23 human sa unang kuwarter ug mao pa gani ang naglabaw sa halftime sa iskor nga 44-41.

Apan ubos sa nagbagang mga kamot ni Lowry, nakabawi ang Raptors human gipabuthan ang Lakers og 22-3 rally sa second half.

Nakapaduol na sab ang Lakers, apan ang Raptors mikadlit og pito ka sagunson nga puntos, samtang si James naglingkod sa ilang bangko aron silyohan ang daog sa Toronto. "We just got aggressive, wanted to go out there and get the win," matud pa ni Lowry. "We were out there doing too much talking. We just wanted to lock in and do our jobs."

Sa laing aksiyon,  ang Los Angeles Clippers mikulit og team record human sila mipasulod og 25 ka tres sa 126-103 nilang kadaogan batok sa New Orleans Pelicans.

Si Paul George miiskor og 28 puntos, samtang si Kawhi Leonard mitali og 24 puntos alang sa Clippers nga miinat sa ikaduhang labing nindot nga rekord sa Western Conference ngadto sa 45-21.

Ang Pelicans nga natagak ngadto sa 28-38, gipangulohan ni Nickeil Alexander-Walker uban ang 15 puntos, samtang ang ilang star rookie nga si Zion Williamson mihipos lamang og siyete puntos ug lima ka rebounds sud sa 14 minutos.

Sa lain pang mga duwa, si T.J. Warren mipabuto og 53 puntos sa dihang gipakaging sa Indiana Pacers ang Philadelphia 76ers sa iskor nga 127-121.

Sila si Jimmy Butler ug Bam Adebayo adunay 22 puntos matag usa ug si Kylly Olynyk mipuntos og 20 sa dihang gipakaging sa Miami Heat ang Denver Nuggets, 125-105, samtang ang Oklahoma City Thunder mipukan sa Utah Jazz  sa iskor nga 110-94.