Paglaum midan-ag sa Cebu basketball

CEBU, Philippines — Taliwala ning panahon sa krisis, dunay paglaum nga midan-ag sa Cebu basketball.

Kini human si league organizer ug multi-titled coach Chelito 'Marvin' Caro mibutyag nga duna na sila'y inisyal nga nahisgutan ni kanhi PBA star ug karon Cebu City Councilor Dondon Hontiveros kabahin sa pagporma og Cebu team alang sa National Basketball League (NBL) kon ugaling mabalik na sa normal ang sitwasyon.

Naporma niadtong Hunyo 2018, ang NBL usa ka rehiyonal nga liga nga naghatag og tsansa sa mga talento gikan sa tagsa-tagsa ka mga siyudad o probinsiya nga makapakita sa ilang abilidad.

Matud pa ni Caro nga duna siya'y benefactor nga dili gusto magpaila nga andam mogasto pagtukod og Cebu team alang sa NBL kon maabot na ang panahon nga tugotan na ang mga basketball events sa mga otoridad sa panglawas ug sa kagamhanan.

"Good news ni alang sa mga Cebuano players," matud pa ni Caro nga kabahin sa National University (NU) coaching staff sa UAAP.

"Nindot sab ni nga liga kay kadto lamang mga residente sa siyudad o probinsiya ang tugotan nga makaduwa sa team nga ilang girepresentaran."

Si Caro nga usa ka four-time champion isip  assistant coach sa Sacred Heart School-Ateneo de Cebu (SHS-AdC) Magis Eagles, mibutyag nga plano nilang gamiton ang pangan nga Cebu Gems sama sa team sa Cebu niadtong panahon sa Metropolitan Basketball Association (MBA) duha ka dekada na ang milabay, apan mananghid usa sila sa Cebuana Lhuillier management nga maoy nagkupot sa katungod sa Gems.

Si Hontiveros, kansang nindot nga salida sa Gems nahimo niyang hagdanan pagsaka sa PBA diin siya nakadaog og tulo ka korona ug 13 ka higayon nahimong All-Star, suportado kaayo ang maong ideya.

"Yes, I'm very supportive of this especially that we already know how the new normal will be with regards to sports," matud pa ni Hontiveros. "It's very encouraging that there are some individuals who like to invest on forming a team. This is a good opportunity for Cebuano players that you have a sponsor that will support the team all the way."

Gawas sa NBL, si Caro mipahibawo nga iya na sab karon gihinay-hinayan pagpanday ang pundasyon sa pagatukuron nilang Visayas-Mindanao Super Liga nga ilang ilusad sunod tuig. Usa kini ka community-based league, kansang tuyo mao ang pagsigpat og mga talento sa Vis-Min region.

Sa iyang bahin, si businessman-sportsman Lorenzo 'Chao' Sy buot sab nga mopasiugda og inter-school league alang sa mga high school ug college teams sa Cebu School Athletic Foundation, Inc. (CESAFI) kon normal na ang sitwasyon.

"This is my own way of giving the CESAFI basketball players something to look forward to with the cancellation of the league's 2020 season," sumala pa ni Chao Sy  nga kasamtangang nagsilbe isip Cebu City Sports Commission (CCSC) vice chairman.

Apil sab sa plano ni Chao Sy ang "Battle of Champions" diin iyang iparang ang mga pambatong collegiate ballclubs sa Sugbo batok sa labing maayong koponan gikan sa NCAA ug UAAP sa Manila.