'No fear' maloloy-on mapasigarbuhon isip 'Dennis Rodman' sa Cebu

CEBU, Philippines — Si kanhi All-Star forward Gabriel 'No Fear' Maloloy-on mapapasigarbuhon nga mihinumdum sa iyang kagahapon isip sakop sa University of the Visayas (UV) Green Lancers. Nahimo siyang miyembro sa UV Lancers 1996 national champion team nga miharos sa titulo sa tanang torneyo nga ilang gisalmotan niadtong panahona, apil na ang Cebu Amateur Athletic Association (nga mao na karon ang CESAFI), Inter-Collegiate Zonals ug ang prestihiyosong National Inter-Collegiate Championships.

"I think wala pa'y naka-break atong amo record," matud pa ni Maloloy-on.

Sunod tuig, gawas nga nadepensaan ang ilang trono sa CAAA, si Maloloy-on nakampiyon sab uban sa Lancers sa Palarong Pambansa ug 1997 Philippine National Games (PNG).

Human sa iyang kampanya uban sa Lancers, si Maloloy-on mihimo og kasikas isip commercial player uban sa Hapee Toothpaste, Osaka Iridology, Chowking, Sunspride, Western Union ug M. Lhuillier. Nakapakita sab siya og aksiyon sa Hapee Toothpaste sa Philippine Basketball League ug ingon man sa Negros Slashers ug Davao Eagles sa Metropolitan Basketball Association (MBA).

Dili man tuod siya eksplosibo sa pinuntosay, apan si Maloloy-on mitatak og pangan gumikan sa wa'y kahadlok niyang modepensa ug ingon man sa kamangtas niya sa rebounding.

Dili siya moatras sa bisan unsang matang sa hagit sud sa korte. Nailhan siya sa pisikal kaayo niyang duwa hinungdan nga gibansagan siyang 'No Fear' ug bersiyon ni Dennis Rodman sa Cebu.

"Idol kaayo nako siya. Ganahan kaayo ko sa iyahang style moduwa. Actually, I'm proud nga gitawag ko og 'Dennis Rodman of Cebu'," matud pa ni Maloloy-on diin ang gipasabot mao ang giilang 'Bad Boy' sa NBA nga si Rodman nga nakadaog og unom ka kampiyonato sa Chicago Bulls ubos sa liderato ni Michael Jordan niadtong dekada 1990s.

Apan si Maloloy-on mipadayag nga nahibawo siya sa iyang limitasyon isip usa ka defensive player.

"Mao gyud na ako mentality, to be a defensive player at all times. No one can teach me about my style. It's only me knows what I do or what I decide to do to my opponent. Seguro gifted lang ko na mahimo kong defensive player," batbat pa ni Maloloy-on.

"Physical game is my favorite, but I know when I will be doing that physical play. Dapat para sa kadaogan. Mao na ang dili makuha sa uban nga players sa akoa kay daghang kusog modula og physical pero dili sila kabalo mogamit unsaon pagpadaog sailang team. Ako, I'm doing that because I want my team to win the game," panapos pa niya.