Ariza, Bertans dili motiwas sa NBA season

CEBU, Philippines — Sila si Trevor Ariza sa Portland Trail Blazers ug Davis Bertans sa Washington Wizards dili motiwas og duwa sa naputol nga NBA season gumikan sa kalibutanhong pandemiya.

Plano sa NBA nga ibalik ang nahunong niining aksiyon sunod bulan, apan sila si Ariza ug Bertans mipahibawo nang daan nga dili sila motaak didto sa Walt Disney Resort sports complex sa Orlando, Florida sa managlahing hinungdan.

Segun sa taho sa ESPN, gusto ni Ariza nga igahin ang iyang panahon sa pagbisita sa iyang anak sud sa usa ka bulan.

Ang desisyon ni Ariza lagmit makakaltas og hangtod sa $1.8 million sa iyang suweldo kon ugaling ang Blazers makasud sa playoffs. Ang desisyon ni Ariza naabot duha ka adlaw sa dili pa ang gikatakdang deadline sa NBA ngadto sa mga players aron pahibaw-on ang ilang teams kon moduwa ba sila o dili sa pagsugod og balik sa liga karong Hulyo 31.

Sa iyang bahin, ang 27-anyos nga si Bertans nagkanayon nga dili siya moduwa alang sa iyang panglawas ug kaluwasan.