Laing upat ka pinoy moaway sa Amerika

CEBU, Philippines — Human ni 'Magic' Mike Plania nga mipakurat sa kalibotan sa boksing human gipilde ang inilog kaayong WBO No.1 bantamweight contender nga si Joshua Greer Jr. sa miaging semana didto sa Las Vegas, duna pa'y laing upat ka mga Pinoy'ng boksidor ang mopakita'g aksiyon didto sa Amerika sunod bulan.

Sila mao si Mark 'Machete' Bernaldez, Reymart 'Assassin' Gaballo, John Vincent 'Mulawin' Moralde ug Fil-Am John Leo Dato.

Si Dato nga atua magbasi sa California makigsinukmagay ni Angel Luna sa Dominican Republic karong Hulyo 10 (Hulyo 11 dinhi sa Pilipinas) didto sa Chumash Casino Resort sa Sta Ynez, California.

Walo ka adlaw sa dili pa harungon ni Dato si Luna, si Bernaldez (20-3, 14KOs) nga kauban ni Plania sa Sanman Gym nga atua magbasi sa General Santos City, makigbinukbukay sa walay pildeng Amerikanong si Albert Bell (16-0, 5KOs) sud sa 10 ka hugna ubos sa catchweight nga 133 libras karong Hulyo 2 (Hulyo 3 sa Pilipinas) didto sa MGM Grand sa Las Vegas.

Sukad napakyas pagsakmit sa WBO Asia-Pacific lightweight belt duha ka tuig ang milabay, si Bernaldez milampos katulo sa miagi niyang upat ka away, apil na niini ang pagpalukapa niya ni Renan Portes niadtong Disyembre 15 sa miaging tuig didto sa Robinsons Mall atrium sa Gensan.

Si Bernaldez, 26-anyos, tataw nga magsagubang og lisud nga tahas batok ni Bell, ang kasamtangang WBC Continental Americas super featherweight champion.

Ang 27-anyos nga si Bell gikan sa Toledo, Ohio misakmit sa WBC title human gibuntog ang kanhi wa'y pildeng si Andy Vences niadtong Hunyo 15 sa miaging tuig didto sa MGM Grand.

Si Vences mao ang boksidor nga mipukan ni Bernaldez pinaagi sa desisyon niadtong Oktubre 26 sa miaging tuig didto sa Reno-Sparks Convention Center.

Sa laing bahin, sila si Gaballo (23-0, 20KOs) ug Moralde (23-3, 12KOs) nga konektado sab sa Sanman Promotions ni JC Manangquil parehong moaway sud sa 10 ka hugna batok sa kontra nga i-anunsiyo pa karong Hulyo 17 (Hulyo 18 sa Pilipinas) didto sa Manual Artime Community Center Theater sa Miami, Florida.