50 ka tuig na sa basketball ug boxing Chao Sy milab-as sa bulawanong mga tuig

CEBU, Philippines — Ang tinamod nga Sugboanong businessman/sportsman nga si Lorenzo 'Chao' Sy mapasigarbuhon nga mihinumdum sa bulawanon niyang mga tuig isip basketball ug boxing promoter nga maoy nagtuboy kaniya sa kalibotan sa paugnat sa kusog dinhi sa Sugbo tunga sa siglo na ang milabay.

Si Sy nga kasamtangang vice chairman sa Cebu City Sports Commission (CCSC), nagkanayon nga atol sa sayong mga tuig sa ilang La Fortuna Bakery niadtong 1968, giingnan siya sa iyang inahan nga mangita og paagi unsaon pagpahibalo sa katawhan sa bag-o nilang produkto nga pan, ang lamian kaayong belgium.

Matud pa ni Sy, nga 16-anyos pa siya niadtong higayona ug junior varsity sa Cebu Eastern College (CEC) Dragons ubos ni coach Guillermo Bas.

Midugang si Sy nga nakahuna-huna dayon siya pagporma og basketball team nga moduwa sa mga barangay tournaments ug exhibition games.

"Every time we play, I always bring our belgium bread and hopia as giveaways to the spectators," tug-an ni Sy.

Niadtong 1970, si Sy mipadayag nga iyang nakumbinsir ang iyang inahan nga mosalmot sila sa Don Vicente Gullas Basketball Cup nga maoy sikat nga torneyo niadtong panahona.

"We have no good players at that time since we're just a small bakery. We lost all our games during our first year. It was only in our second year that I started hiring  expensive players from UV, SWU, and MICAA," asoy pa ni Sy.

Nakampiyon ang La Fortuna Bakery ballclub sa Don Vicente Gullas Cup sud sa tulo ka sagunson nga tuig niadtong 1971 ngadto sa 1973.

Apil sa mga sikat niyang players niadtong tungora mao sila si two-time Olympian Joaquin Rojas, Ramon 'El Presidente' Fernandez, Zotico 'Tuco' Tan, Manny Paner, Yoyong Martirez, Aljendarito Miego,  Wilfredo Velasco, Elmer Cabahug, Marlowe Jacutin, Danilo Florencio, Larry Mumar ug uban pa.

Si Sy mipahibalo nga plano niyang mopahigayon og Golden Team grand reunion karong Septiyembre kon ugaling tugotan na sa kagamhanan ang mga tapok-tapok taliwala ning pandemiya.

Niadtong 1974, si Sy misulod sa boxing promotion human giawhag sa iyang classmate sa grade school nga si Rex 'Wakee' Salud, usa sa giyukboan nga mga boxing promoters sa Sugbo.

Matud pa ni Sy nga duna siya'y 15 ka mga boksidor niadtong tungora, apil na niini si Frank Cedeno nga nahimong world champion. Gidugokan ang una niyang boxing promotion diin nagsangka ang duha ka world champions nga sila si Bernabe Villacampo ug Rolando Navarette niadtong Enero 31, 1976 sa Cebu Coliseum.

Lima ka dekada ang milabay, si Sy nagpabiling aktibo sa basketbol ug boksing. Gawas sa iyang puwesto sa sports commission, nagsilbe sab siya nga consultant sa Association of Boxing Alliances in the Philippines (ABAP) sa Central Visayas.  Kini kay alang ni Chao Sy, ang sports kabahin na sa iyang kinabuhi.