Abueva suspendido pa gihapon

CEBU, Philippines — Kon si PBA commissioner Willie Marcial maoy pasultion, si Phoenix forward Calvin Abueva pabiling suspendido.

Matud pa ni Marcial nga ang paglibkas sa suspensiyon ni Abueva nadelatar gumikan sa pag-ulbo sa krisis sa Covid-19.

Dugang pa ni Marcial nga duna pa siya'y gipahimo nga usa ka rekisito aron higpit nga malibkas nila ang suspensiyon sa gibansagan nga "The Beast" sa liga.

"I'm still asking him to work on another requirement. That's based on what we have talked about already. So once he satisfies that requirement, then I'll make a decision," matud pa ni Marcial.

Sa iyang bahin, si Phoenix coach Louie Alas masaligon nga makabalik sa ilang team si Abueva kon ugaling mahimo niini ang gipabuhat kaniya sa liga.

"That's like the last condition set (by (Marcial), which he is told to comply. He just couldn't do it brought about by the (community) quarantine. But like comm (Willie) already said, once he's done it, they'll assess," matud pa ni Alas ngadto sa ESPN5. "Calvin is doing everything that he's told."

Niadtong Hunyo 4 sa miaging tuig, si Abueva gisuspenso sa PBA gumikan sa paghapak niini sa liog sa import sa TNT nga si Terrence Jones ug dayon sa pagbalikas niini sa uyab ni Bobby Ray Parks.