1998 Alaska team labing hait sa ' triangle offense'

CEBU, Philippines — Dili masukod ang kalampusan ni coach Tim Cone samtang gigamit niining armas ang "Triangle Offense" sa dihang nag-coach pa siya sa Alaska Milkmen sa PBA niadtong dekada '90

Gani mao kini ang hinungdan nganong iyang gituboy ang Alaska ngadto sa talagsaong grandslam title niadtong 1996.

Apan usa ka dakong surprisa ang paghingan ni Cone sa 1998 Alaska team isip labing hait nga koponan nga iyang gidala ubos sa pilosopiya sa "Triangle Offense" nga giimbento ni kanhi Chicago Bulls ug LA Lakers assistant coach Tex Winter.

Kini tungod ni Kenneth Duremdes.

Matud pa ni Cone nga natural kaayo ni Duremdes ang pagsunod sa ilang sistema maong hapsay kaayo ang iyang pagpadagan sa kalibre sa ilang opensa.

"For some players it comes naturally, while some players really have a hard time. But for Kenneth, it just came easy," matud pa ni Cone. Si Duremdes naabot sa Alaska human ang Uytengsu franchise naka-grandslam.  Sa una niyang season, si Duremdems nakadaog sa una niyang titulo sa 1997 Governors' Cup.

Uban sa Alaska Big 3 niadtong panahona nga sila si Johnny Abarrientos, Jojo Lastimosa, ug Bong Hawkins, nindot kaayo ang timplada ni Duremdes sa Alaska diin sila naghari sa All-Filipino ug Commissioner's Cup niadtong 1998 PBA season.