Mayweather nanghinUklog, gustong mag-trainer

CEBU, Philippines — Ang retiradong boksidor nga si Floyd Mayweather Jr., nagtinguha nga mosunod sa lakang sa iyang uyoan nga si Roger isip usa ka malampusong trainer.

Si  Mayweather miretiro gikan sa boksing niadtong 2017 nga walay pilde sud sa 50 ka away.

Mao kini ang gipadayag ni Mayweather pinaagi sa usa ka mensahe sa iyang Instagram inubanan ang usa ka video footage diin makita nga iyang gi-train ang 14-anyos niyang pag-umangkon.

"I am new at training and so far I've been working with people with no boxing experience, therefore we are growing together," suwat pa ni Mayweather sa iyang IG. "But I promise you, I will be one of the best trainers in the world."

Si Roger Mayweather nga namatay sa miaging bulan sa edad nga 59, maoy nagbaid sa abilidad ni Floyd sa sagad nga bahin sa karera niini.

Nagkanayon si Mayweather nga gumikan sa pagpanaw sa iyang uyoan nadasig siya nga tabangan kadtong mga nangambisyon magboksidor nga duol sa iyang dughan sama sa gibuhat sa iyang uyoan ngadto kaniya.

Miangkon si Mayweather nga ang pagpuyo niya sa iyang balay gumikan sa coronavirus pandemic nakahatag kaniya og higayon aron manghinuklog kon unsay angay'ng buhaton aron siya makatandog sa kinabuhi sa uban ug makatabang pagkab-ot sa ilang mga damgo.