Tualya ni Kobe nahalin P1.65 milyones
CEBU, Philippines — Nahalin og $33,000 kon P1.65 million ang tualya ni Los Angeles Lakers legend Kobe Bryant atol sa usa ka auction kagahapong adlawa didto sa Amerika.
Ang maong tualya gigamit ni Bryant pagtrapo sa iyang singot samtang siya namulong sa panamilit niyang mensahe sa katapusan niyang duwa sa NBA. Ang tualya nalandig sa mga kamot sa usa ka fan samtang si Bryant milakaw gawas sa korte padung sa ilang locker room. Pila na ka higayon nga nabaligya kini sa wala pa mahalin ning labing uwahing auction.
Ang nakadaog nga bidder mitanyag og $33,077 alang sa maong tualya. Ang buyer nakadawat sab og duha ka nagamit nga tickets atol sa duwa sa Lakers niadtong Abril 13, 2016.
Sa maong duwa, si Byant miiskor og 60 puntos sa 101-96 nga kadaogan sa Lakers batok sa Utah Jazz.
Si Jeff Woolf, ang presidente sa Iconic Auctions, mipahibalo sa CNN nga ang nakadaog nga bidder nailhan sa kadaghan niini og koleksiyon ug memorabilia sa Lakers.
Si Bryant namatay niadtong Enero sa edad nga 41 sa usa ka helicopter crash kauban ang lain pang walo ka mga tawo, apil ang 13-anyos niyang anak nga si Gianna.
- Latest
