Marquez adunay bag-ong gikumpisal
CEBU, Philippines — Adunay bag-ong gikompisal si Mexican boxing legend Juan Manuel Marquez kabahin sa mainit nga panagkaribal nilang Manny Pacquiao.
Segun sa taho sa World Boxing News, si Marquez nagkanayon nga dili $100 million kondili $150 million (P7.5 billion) ang gitanyag kaniya aron sangkaon ang Pinoy ring star sa ikalimang higayon.
Si Marquez atua karon sa Las Vegas diin siya mihatag sa iyang opinyon kabahin sa sunod nga lakang ni Pacquiao sa karera niini ug ingon man sa miagi nilang rematch.
Sa iyang pangagpas, ang 46-anyos nga si Marquez nagkanayon nga si Pacquiao moaway sunod batok ni Errol Spence o dili ba ni Terence Crawford.
"Maybe it would be that Manny Pacquiao fights with Errol Spence or Terence Crawford," matud pa ni Marquez. "It would be a great fight. Pacquiao is a legend. Pacquiao is a great fighter. I think it would be a good fight with Pacquiao and Terence Crawford."
Sa dihang gisukna kabahin sa ikalimang away batok ni Pacquiao, si Marquez mitug-an nga mas gipadak-an pa ang unang tanyag kaniya nga $100 million og $50 million aron kini mahitabo, apan iya kining gibalibaran.
"When the Pacquiao people told me about the fifth fight for $150 million, I said 'no more'. I retired and said no more. No return," dugang pa ni Marquez.
Kontrobersiyal kaayo ang nag-una nilang tulo ka sangka, apan si Marquez mitay-og sa kalibotan sa boksing human niya pagpakatug si Pacquiao sa ikaunom nga hugna sa ikaupat nilang sangka niadtong 2012.
- Latest
