Durant nagpositibo sa COVID-19

CEBU, Philippines — Ang NBA superstar nga si Kevin Durant gikataho nga usa sa upat ka players sa Brooklyn Nets nga nag-positibo sa COVID-19 ug gi-quarantine na karon ang iyang kaugalingon.

Ang injured nga si Durant, kinsa wala pa makaduwa sa Nets sukad siya mitapon sa Brooklyn sa miaging tuig, mikompirmar ngadto sa The Athletic website nga positibo siya sa maong gikahadlokang virus.

"Everyone be careful, take care of yourself and quarantine. We're going to get through this," matud pa ni Durant.

Ang Nets nagkanayon nga ila na karong gipahibalo ang nahibaw-an nilang nakahimo og pisikal nga kontak sa ilang mga players, apil na kadtong mga teams nga ilang nakasangka sa wala pa suspensoha sa NBA ang kasamtangan niining season niadtong Marso 12.

Ang katapusang na-engkuwentro sa Nets mao ang Los Angeles Lakers, nga gipilde sa Brooklyn sa iskor nga 104-102 niadtong Marso 10.

Ang LA Lakers management pinaagi sa usa ka pamahayag nagkanayon nga gipahibalo na sila sa upat ka Nets nga nag-positibo ug ila na karong gialerto ang kaugalingon nilang mga players ug staff.

"Given the exposure risks from our game against the Nets on March 10th we are following the next steps of our COVID-19 procedures and protocols that are established in consultation with various health officials, the NBA and our UCLA Health doctors," matud pa sa Lakers.

Samtang ang Nets mipadayag nga ang tanang nilang players ug miyembro sa ilang team travel party ila nang giawhag nga mag-quarantine ug monituron ang ilang panglawas.

Sa pagka karon, pito na ka NBA players ang nagpositibo ning bag-o nga virus.

Si Utah Jazz big man Rudy Gobert maoy labing unang NBA player nga nag-positibo sa COVID-19. Gisundan kini sa iyang teammate nga si Donovan Mitchell ug ang ikatulo mao si Christian Wood sa Detroit Pistons.