Sibonganhon mikulit og kasaysayan sa Gullas Cup
CEBU, Philippines – Si Ehman Janson Suarez mihimo og kasaysayan isip labing unang player gikan sa Sibonga nga midaog sa season Most Valuable Player (MVP) award sa Gullas Cup, ang tinuig nga basketball tournament alang sa mga batan-ong basketbolista sa tanang lungsod ug siyudad nga naglangkob sa unang distrito sa Sugbo.
Ang 19-anyos nga si Suarez mikab-ot sa labing dako nga dungog sa iyang karera gumikan sa iyang kahanas sa halos tanang aspeto sa duwa nga makita sa iyang average nga 21.8 points, 11.2 rebounds, 2.8 assists, 2.2 steals ug 1.6 blocks matag duwa atol sa Gullas Cup: Vision 2020 Cebu First District Under 21 Basketball Tournament nga nahuman niadtong Marso 6.
Siya sab maoy best rebounder sa liga.
Ang mangtas nga sentro awtomatik nga nasud sa Mythical Five uban sa iyang teammate nga si Wendell Cadampog (small forward), Patrick Dobleros (point guard) sa Minglanilla Archangels, Rey Alfeche (power forward) sa Carcar City Lechoneros ug Keaton Clyde Taburbal (shooting guard) sa back-to-back champion Talisay City Aquastars.
"Happy lang gyud ko sa result sa akoang paningkamot. Di gyud ma-explain akong gibati nga daghan kaayo ang mi-appreciate sa akoang duwa. At least, ma-known sab among lungsod when it comes to sports," matud pa sa garbo sa Gahad, Poblacion, Sibonga. "As team captain, kailangan gyud ipakita nako ang akong best sa akoang mga teammates kay dako kaayo sila'g expectations sa akoa. Dili nako gub-on ang ilang pagsalig ug dapat naa koy naipakita nila in return."
Luyo sa liderato ni Suarez, ang Sibonga Pillars mitapos sa ikatulong dapit nga mao sa'y labing taas nilang nakab-ot sa kasaysayan sa Gullas Cup.
Gibutyag ni Suarez nga ang usa sa mga hinungdan sa natagamtaman niyang kalampusan mao ang hugtanong suporta sa iyang pamilya.
"Inspirasyon gyud nako ang akong pamilya especially ang akong mama nga grabe kaayo ang supporta ug pag-care sa akoa ilabi na sa iyang mga advices. Sa ako sab papa nga mao gyuy nag-encourage nako sa pagduwa ug pag-love sa basketball. I am my father's legacy," sumala pa ni Suarez.
- Latest
