Arum salig ni Casimero
CEBU, Philippines – Gitan-aw sa kadaghanan nga si Japanese superstar Naoya Inoue ang modaog sa sangka niini batok ni WBO bantamweight champion Johnriel Casimero.
Apan ang bigboss sa Top Rank Inc. nga si Bob Arum mitan-aw sa Pinoy boxer nga adunay dakong tsansa nga modaog.
Usa ka bulan pa ang paabuton, apan kusog na kaayo ang kasikas alang sa giisip nga 'blockbuster fight' tali ni Inoue, kinsa nagkupot sa WBA, IBF ug Ring Magazine belts ug ni Casimero sa Abril 25 didto sa Las Vegas.
Si Arum miingon nga kusog ang pinalitay sa tiket tungod kay daghan ang interesado nga mosaksi sa sangka sa duha ka mga knockout punchers.
Si Arum nagkanayon nga si Inoue na ang usa sa labing maayong world champion gikan sa nasud sa Japan ug daling misulbong ang pangan niini sa world pound-for-pound rankings human gipilde si Nonito Donaire Jr. niadtong miaging tuig.
Hinuon, dili angay nga baliwalaon si Casimero, kinsa gitan-aw niya nga adunay kusog ug abilidad nga tupngan si Inoue.
Gibasihan ni Arum ang upset nga kadaogan ni Casimero batok ni kanhi South African champion Zolani Tete niadtong Disyembre.
"Casimero has a good chance, he is a very good puncher, it should be a spectacular fight," matud ni Arum sa Philstar.com
- Latest
