Davao vs Zamboanga sa MPBL semis
MANILA, Philippines — Maghaharap ang top seed Davao Occidental Tigers at No. 5 seed Zamboanga Family Sardines sa best-of-three semifinal series ng Southern Division matapos magwagi sa magkahiwalay na quarterfinal matches sa pagpapatuloy ng 2019-2020 MPBL-Chooks-to-Go Lakan Cup sa Rizal Memorial College Gym sa Davao City.
Nangailangan ng overtime period ang Davao Tigers bago tuluyang nadispatsa ang No. 8 seed Bicol Volcanoes, 64-56, para tapusin ang serye, 2-1, habang pinatumba naman ng Zamboanga ang No. 4 Batangas Athletics, 69-52, upang itakas ang ikalawang semis berth sa South group.
Ito na ang ikalawang sunod na pumasok ang Davao Occidental sa semis kung saan winalis nila ang Bacoor Strikers, 2-0, sa nakaraang Datu Cup habang ang Zamboanga naman ay pumasok din sa semifinals sa ikalawang sunod na pagkakataon nang magwagi sa Muntinlupa, 2-1, sa quarterfinals ng nakalipas na conference, ngunit nabigo sila sa Batangas City, 1-2, sa semis.
- Latest
