Gilas coach naalarma sa Thailand

CEBU, Philippines – Bisan gilubong nila ang Indonesia,  dili gihapon mokompiyansa ang Gilas Pilipinas sa   Thailand nga maoy sunod nilang sangkaon sa FIBA Asia Cup 2023 World Cup qualifiers sa Nobiyembre didto sa Smart Araneta Coliseum.

Naalarma si Gilas  coach Mark Dickel sa gipakita sa Thailand gumikan kay diriyot nila mapilde ang powerhouse South Korea sa miaging adlaw sa iskor nga 86-93.

Nakita sa Gilas coaches nga angay bantayan gikan sa Thailand ang Thai-American nga si Tyler Lamb kinsa mibomba og 28 puntos ug 12 ka rebounds.

Miingon si Dickel nga kon susamang line-up iyang gamiton, makasugat sila og problema sa depensa batok ni Lamb.

Tungod niini, si Dickel mopahigayon og team practice kausa matag semana aron maandam sila batok sa Thailand.