Fajardo nahasol sa injury
CEBU, Philippines — Gitambagan sa mga doktor si JuneMar Fajardo sa San Miguel Beermen nga dili una maglakaw-lakaw human sa operasyon sa iyang tuong tiil nga nabali atol sa team practice tulo ka semana na ang milabay.
Matud pa nga seryoso kaayo ang injury ni Fajardo ug kinahanglan kini og rehabilitasyon ug dili angay'ng matandog. Sud sa duha ka bulan, ang 6-foot-10 nga si Fajardo gidid-an nga molakaw o motukod sa iyang injury.
Si Fajardo nagmulo usab sa pagsakit sa tiil matag gabii ug maglisud siya sa pagkatulog ug kinahanglan imnan kini og tambal aron makapahuway siya.
"Masakit daw especially at night. Bothering talaga because he’s not used to it," matud pa ni coach Leo Austria.
Ang multi-titled coach miingon nga gipadaplin una sa coaching staff sa Beermen ang paghandum kon kanus-a makabalik ang Cebuano center sa hardcourt tungod kay mas mahinungdanon alang kanila nga makarekober kini sa maong seryosong injury.
Si Fajardo segurado na nga mapalta sa All-Filipino Cup ug wala pa sa'y seguro kon makaduwa na ba sa Commissioner's Cup depende sa iyang recovery.
- Latest
