Irving dili na kaduwa pa karon nga season
CEBU, Philippines — Operahan ang tuong abaga ni Brooklyn Nets star Kyrie Irving ug dili na kini makaduwa pa sa nahibiling bahin ning NBA season.
Si Irving misuway og duwa bisan og dunay dili maayong gipamati sa iyang abaga niadtong Nobiyembre, apan nakapalta ra sab dayon kini og 26 ka duwa.
Sa tinguha nga makalikay og surgery, si Irving nagpa-inject og cortisone niadtong adlaw sa Pasko hinungdan nga nakabalik kini sa aksiyon niadtong Enero 12.
Nakasalida siya sud sa siyam ka duwa sa wala pa maangol ang tuo niyang tuhod atol sa ilang duwa batok sa Washington Wizards niadtong Pebrero 1.
Sa dihang nahinabi sa mga tigbalita niadtong Pebrero 4, si Irving miangkon nga andam siyang magpa-opera kon ugaling padayon siyang bation og kasakit sa iyang bukton.
Si Irving mi-average og 27.4 points, 5.2 rebounds ug 6.4 assists matag duwa niini nga season.
Bitbit ang 25-28 record, ang Nets ikapito karon sa Eastern Conference, labaw lamang og duha ka daog sa Orlando Magic nga maoy nagkumpayot sa ikawalo ug katapusang luna sa playoff.
- Latest
