Harden, Westbrook, Zion mibida sa ilang koponan

CEBU, Philippines – Mipabuto og 42 puntos si James Harden ug si Russell Westbrook miduslit  og 36 puntos alang sa Houston Rockets nga miputol sa pito ka sagunson nga daog sa Boston Celtics, 116-105  sa NBA kagahapon didto sa Houston, Texas.

Sikit pa unta kaayo ang duwa, apan ang Rockets kalit lang milusad og 5-2 rally aron mosutoy ngadto sa 116-98 nga labaw sa nahibiling dos minutos sa duwa. Wala na na makabawi pa sukad niadto ang Celtics.

Gawas sa bagsik nilang opensiba, si Harden duna sa'y walo ka rebounds ug pito ka assists, samtang si Westbrook milangkat og 10 ka rebounds ug lima ka assists.

Si Gordon Hayward mipupo og 20 puntos, samtang sila si Jaylen Brown ug Jayson Tatum nagkumbinar og 34 puntos alang sa Celtics nga naparot sa labing unang higayon sukad niadtong Enero 26.

Didto sa New Orleans, si Zion Williamson mipabuhagay og 30 puntos sa labing unang higayon sa iyang karera sa ikasiyam pa lamang niyang duwa sa NBA.

Ang No.1 draft pick mitali og 31 puntos sud lamang sa 28 minutos aron pangulohan ang Pelicans ngadto sa 138-117 nga kadaogan batok sa Portland Trail Blazers.

Miamot si JJ Redick og 20 puntos, si Jrue Holiday dunay 16 puntos ug 10 ka assists, samtang si Lonzo Ball mikolekta og 10 puntos ug 10 ka assists alang sa Pelicans nga nabiyaan og 16 puntos sa unang kuwarter, apan nagmangtas sa second half aron paksiton ang Blazers.