Wiggins gisugat og pilde
CEBU, Philippines — Nalihian og pilde ang kanhi No.1 pick nga si Andrew Wiggins sa labing una niyang duwa uban sa Golden State Warriors human sila gipukan sa Los Angeles Lakers, 125-120, kagahapon didto sa Chase Center sa San Francisco, California.
Kini ang unang duwa ni Wiggins uban sa Warriors human ang dakong trade diin gibira siya gikan sa Minnesota Timberwolves bugti sa All-Star nga si D'Angelo Russell.
Daghan ang mitan-aw kaniadto ni Wiggins nga usa ka umaabot nga superstar, apan wala kaayo kabuwelo ang karera niini tungod usab kay di siya haom sa iyang koponan. Sa iyang paglayat sa Warriors, daghan ang naglaum nga mapasidlak pagbalik sa batan-ong player iyang kasikat sa NBA.
Bisan pa sa kapildehan, si Wiggins mipakita sa iyang abilidad sa iyang 18 puntos ug lima ka steals.
Dili hinuon kini igo aron matarug ang West Conference top seed nga subling gibidahan ni LeBron James nga mirehistro og 22 puntos, 11 ka assists ug walo ka rebounds.
Si Anthony Davis adunay 27 puntos ug 10 ka rebounds, samtang si Avery Bradley miiskor og 21 puntos.
Didto sa Toronto Canada, ang defending champion nga Raptors miinat sa ilang winning-streak ngadto sa 14 nga mao nay labing taas sa kasaysayan sa ilang koponan.
Gipakita sa Raptors nga makaya nila pagpabilin ang ilang kadominante bisan pa og wala na kanila karon nga season si Kawhi Leonard.
Ang Raptors mipatapsing sa Brooklyn Nets, 119-118, sa pagpangulo sa point-guard nga si Fred VanVleet nga adunay 29 puntos, samtang si Pascal Siakam mihimo og 20.
Sa ubang mga duwa, ang Milwaukee Bucks milubong sa Orlando Magic, 111-95, ang Minnesota Timberwolves mihambat sa Los Angeles Clippers, 142-115, ang Dallas Mavericks mipukan sa Charlotte Hornets, 116-100, ang New Orleans Pelicans midagit sa Indiana Pacers, 124-117 ug ang New York Knicks mipakaging sa Detroit Pistons, 95-92.
- Latest
