Yulo nagpatikim ng performance para sa Tokyo Olympics
MANILA, Philippines — Asahan ang mas magarbong routine mula kay world champion Carlos Yulo sa oras na sumabak ito sa 2020 Olympic Games sa Tokyo, Japan sa Hulyo.
Hindi biro ang pinagdadaanang training ni Yulo sa Japan dahil mas matinding performance ang nais nitong ipakita sa Tokyo Olympics.
Mas mataas na degree of difficulty na inaasahang magdadala sa kanya sa inaasam na gintong medalya sa Olympics.
Ipinasilip ni Yulo ang kanyang magiging performance sa Tokyo Games sa kanyang Instagram account kung saan mula sa kanyang double back noong 2019 FIG World Artistic Gymnastics Championship sa Stuttgart, Germany, ginawa itong triple back.
Hindi pa kuntento si Yulo sa kanyang bagong routine ngunit inaasahang mas magiging malinis ito sa oras na tumapak ang kanyang mga paa sa Tokyo Olympics.
“A bit messy but hey! This is the first time and first try doin this on the actual floor. PS: I was so terrified,” ani Yulo sa kanyang post.
Nagkomento pa ito na “chamba lang” matapos ang komento ng isang fan.
Masaya pang naririnig ang tawa ni Japanese coach Munehiro Kugimiya sa video na tila satisfied sa ipinamalas ng Pinoy champion.
Humakot ang post ng kaliwa’t kanang papuri hindi lamang sa kanyang mga tagahanga maging sa iba’t ibang world class gymnasts na nagkomento kabilang na si 2016 Rio Olympics gold medallist at kapwa 2019 Stuttgart world champion na si Arthur Nory ng Brazil.
Nagkomento rin sina 2019 Pan America bronze medallist Fede Molinari ng Argentina, American NCAA gymnast Hamish Carter ng University of Illinois at 2019 Stuttgart parallel bars world champion Joe Fraser ng Great Britain.
“So good,” ani Fraser.
- Latest
