Legasiya ni Kobe ipadayon ni LeBron James

CEBU, Philippines – Si NBA superstar LeBron James mipabuhagay kagahapong adlawa sa dili mahulagway nga gibati niyang kaguol nunot sa kalit nga pagkamatay ni Kobe Bryant dayong saad sa emosyonal niyang Instagram post nga iyang ipadayon ang legasiya ni Bryant uban sa Los Angeles Lakers.

Sa makapakugang nga insidente nga mitay-og sa kalibutan sa sports sa bisan asang dapita, si Bryant nakutloan sa hinulman niyang kinabuhi human mahagsa nga gisakyan niining helicopter didto sa bukirang bahin sa LA nga mikalas sa kinabuhi sa tanan niining siyam ka mga pasahero apil na ang 13-anyos niyang dalagita nga si Gianni.

Si Bryant, nga nakadaog og lima ka kampiyonato sa 20 ka tuig niyang pagsalida sa Lakers, nag-edad og 41 anyos.

Ang trahedya nahitabo pipila lamang ka oras human si Kobe gilabyan ni James sa ikatulong dapit sa listahan sa NBA all-time scoring list.

Matud pa ni James nga dili masukod ang gibati niyang kasakit sa pagtaliwan ngadto sa laing kalibutan sa gilantaw niyang idolo ug igsoon. Nagkanayon si James nga si Bryant usa sa iyang mga inspirasyon ug dako og nahimong papel sa kon unsa man gani ang iyang naabot ning puntohan sa iyang karera.

“I’m heartbroken and devastated my brother,” buhagay pa ni James sa iyang IG account. “Man I love you big bro.”

Giklaro ni James nga hangtud karon dili gihapon siya makatoo sa makapakurat nga kamatayon sa iyang karibal sa korte apan giisip niyang suod nga higala nga haduol kaayo sa iyang kasingkasing ug dughan.

Lakip sa pagpanamilit ni James ngadtong Kobe mao ang pasalig nga iyang padayonon ang legasiya niini aron ang kabilin sa “Black Mamba” sa kanunay handumon sa iyang mga fans ug niadtong mga tawo kansang kinabuhi iyang natandog.

“I promise you I’ll continue your legacy man! You mean so much to us all here especially #LakerNation and it’s my responsibility to put this shit on my back and keep it going!!” saad pa ni James.