Pasig nakasilip pa ng pag-asa
PASIG , Philippines — Binura ng Pasig-Sta. Lucia Realtors ang 12-point deficit sa ikatlong yugto tungo sa 82-75 panalo kontra sa Biñan City-Luxxe White sa pagpapatuloy ng Chooks-to-Go-Maharlika Pilipinas Basketball League (MPBL) Lakan Cup sa Alonte Sports Arena sa Biñan, Laguna.
Nagsanib puwersa sina Josan Nimes at Jeric Teng ng 23-5 blast upang muling angkinin ang bentahe, 63-58, para itakas ang kanilang ika-16 panalo sa 27 laro at panatiliing buhay ang pag-asa na makapasok sa 8-team playoff round ng Northern Division.
Umani ang dating NCAA Rookie of the Year na si Nimes ng 30 puntos, 11 rebounds at tatlong steals habang si Teng ay tumulong ng 18 puntos, limang assists at apat na rebounds para putulin ang six-game winning streak ng Biñan.
Ang Biñan ay nahulog sa ika-sampung puwesto sa 12-15 win-loss kartada sa Southern Division.
Tumipak din ng tig-siyam na puntos sina Argel Mendoza at Leo Najorda para sa Realtors.
Sa iba pang laro, humataw si Ronjay Buenafe ng 26 puntos, pitong rebounds at anim na assists upang iangat ang Bicol-LCC Volcanoes sa 86-72 panalo laban sa Sarangani Marlins.
Umiskor din ng 20 puntos si Alwyn Alday na may kasamang limang rebounds at dalawang assists at 12 puntos naman mula kay Jonathan Aldave para ilapit ang Volcanoes sa playoff round sa kanilang 14-13 slate.
Naka-eskapo naman ang Marikina Shoemasters laban sa Imus Bandera, 89-86, sa iba pang laro.
- Latest
