Donaire batok Inoue maoy Fight of the Year
CEBU, Philippines — Ang kulbahinam nga sangka tali nila Pinoy boxing superstar Nonito Donaire Jr. ug Japanese champion Naoya Inoue niadtong miaging Nobiyembre maoy gibayaw nga 'Fight of the Year' sa Boxing Writers Association of America.
Gipahigayun didto sa Saitama Super Arena, nasaksihan sa mga boxing fans ang grabeng kinulatahay sa duha ka bantamweight kings, apan sa uwahi, giisa ang kamot ni Inoue nga mananaog pinaagi sa unanimous decision.
Ang 35-anyos nga si Donaire isug nga nakigbinukbukay sa mas bata nga kampiyon. Kapila niya natay-og si Inoue, apan mas nakapabor ang nauwahi human niya mapaluhod si Donaire pinaagi sa usa ka bodyshot sa 11th round.
Si Inoue mikumbisir sa mga hurado nga siya ang daog og miani sa puntos nga 117-109, 116-111 ug 114-113 batok ni Donaire. Sa maong kadaugan si Inoue misakmit sa IBF ug WBA titles uban ang Muhammad Ali trophy.
Sa maong resulta, daw wala maibani ang reputasyon ni Donaire ug daling gidungog ang usa ka rematch tali sa duha. Hinuon, si Donaire giparang karon sa WBC champion nga si Nordine Oubalii alang sa usa ka sangka karong tuiga.
Laing mga kandidato alang sa Fight of the Year mao ang mga sangka tali nila ni Gennadiy Golovkin-Sergiy Derevyanchenko, Manny Pacquiao-Keith Thurman, Andy Ruiz-Andy Joshua I, Errol Spence Jr.-Shawn Porter ug Josh Taylor-Regis Prograis.
- Latest
