Mayweather napiling 'Fighter of the Decade'
CEBU, Philippines — Ang undefeated welterweight nga si Floyd Mayweather Jr. maoy gikoronahan nga 'Fighter of the Decade' sa prestihiyosong Boxing Writers Association of America (BWAA) awards.
Sa gipagawas nga resulta sa botasyon kagahapon, si Mayweather ang napili nga Fighter of the Decade sa mga sports ug boxing writers, samtang ang Mexican nga si Saul Alvarez maoy Fighter of the Year.
Sa wala pa ang resulta, kusog ang lalis kon kinsa tali nila ni Mayweather ug karibal nga si Manny Pacquiao ang angay ilhon nga labing maayong boksidor sa dekada, apan sa katapusan, ang undefeated American ang napili sa mga batid sa boksing.
Ang five-division world champion adunay rekord nga 50-0, 27KOs sa wala pa siya mideklarar sa iyang pagretiro niadtong 2015 human niya mapilde si Pacquiao pinaagi sa unanimous decision.
Mihaw-as siya sa retirement niadtong 2017 aron sangkaon si MMA superstar Conor McGregor nga iyang gipilde pinaagi sa 10th round TKO.
"Thank you to the Boxing Writers Association of America for voting me Fighter of the Decade," matud ni Mayweather sa ESPN5. "I am honored to be recognized by the media who covered my career throughout its many decades.Boxing has been a part of my life since I was 2 years old and I dedicated my life to it and gave it my all."
Sa lain bahin, si Mayweather wala mihisgot kabahin sa posibilidad nga mohaw-as ba siya sa retirement aron hatagan si Pacquiao sa dugay niyang gipangayo nga rematch.
- Latest
