Ingram mirakrak og career-high 49 points

CEBU, Philippines — Mirehistro og career-high 49 puntos si Brandon Ingram atol sa kadaogan sa New Orleans Pelicans batok sa Utah Jazz, 138-132 sa NBA kagahapon.

Naglabaw unta ang Jazz og singko puntos, 132-127 human sa tres ni Bojan Bogdanovic sa nahibilin nga 2:28 sa overtime, apan wala na sila makaiskor pa sukad niadto nga nakaputol sa 10 nila ka sagunson nga daog. 

Sa pikas bahin, ang Pelicans mipasud og 11 ka sunod-sunod nga puntos kortesiya nilang Derrick Favors ug E'Twaun Moore ug pito ka free throws aron sa pagkawat sa daog.

Si Favors mitapos uban ang 21 puntos, 11 ka rebounds ug tulo ka blocks batok sa kanhi niya team, samtang si Moore miamot og 16 puntos alang sa Pelicans nga midaog sa ika-10 nga higayon sa miagi nilang 14 ka duwa.

Dako sab og naambag sila si Nickeil Alexander-Walker ug Jaxson Hayes nga nagkumbinar og 21 puntos alang sa Pelicans.

Nangu sa pilderong Utah mao si Donovan Mitchell uban ang career-high 46 puntos, samtang si Bojan Bogdanovic mitali og 26 puntos.

Sa laing aksiyon, si Giannis Antetokounmpo mihipos og 32 puntos ug 17 ka rebounds, samtang si Khris Middleton miiskor og 23 sa dihang  gipakaging sa Milwaukee Bucks ang Boston Celtics, 128-123.

Si Antetokounmpo miposte sa ika-35 niyang double-double karon nga season alang sa Bucks nga nakasagunson og lima ka daog aron inaton ang labing nindot nga record karon sa liga ngadto sa 37-6.

Si Kemba Walker mikamada og 40 puntos alang sa pilderong Celtics.