Irving wa'y pagbahar

CEBU, Philippines — Bisa'g gamay nga taya walay gipakitang timailhan si Kyrie Irving sa labing una niyang duwa sud sa duha ka bulan human kini mikadlit og 21 puntos aron pangulohan ang Brooklyn Nets nga mibihag sa Atlanta Hawks,   108-86 sa NBA kagahapon.

Si Irving nga mibalik sa korte sa labing unang higayon human makapalta og 26 ka duwa gumikan sa problema sa tuo niyang abaga, wa'y pagbahar ug gani mas mihait pa kay kausa lamang masipyat sa 11 niya ka mga itsa.

"I just work on my game diligently," matud pa ni Irving nga katapusang nakapakita og aksiyon niadto pang Nobiyembre 14. "You have nights like this coming back. I just love the game, I missed it so much."

Wala na moduwa pa si Irving sa naghinapos nga bahin sa ikatulong kuwarter diin ang Nets miposte og 27 puntos nga labaw, 87-50.

Mao kadto ang ikaduhang sunod-sunod nga daog sa Nets human sila masagunsoni og pito ka pilde.

Si Taurean Prince miiskor og 14 puntos, samtang sila si Caris LeVert ug DeAndre Jordan parehong miamot og 13 puntos alang sa Nets nga mipukan sa Hawks sa ikawalong sunod-sunod nga higayon.

Didto sa New York, si Taj Gibson milansang og duha ka krusyal nga free throws sa nahabiling 98 segundos sa aksiyon aron agakon ang Knicks ngadto sa 124-121 nga pagpakugang sa Miami Heat.

Si Julius Randle miratsada og 26 puntos aron tabangan ang Knicks pagpakgang sa lima ka sagunson nilang pilde.

Sa lain pang mga resulta, ang San Antonio Spurs nakaipsot sa Toronto Raptors, 105,104, ang Memphis Grizzlies milubong sa Golden State Warriors, 122-102 ug ang Phoenix Suns midaog sa Charlotte Hornets, 100-92.