Flores Cousins 2-0 na sa Amicis caging

CEBU, Philippines – Si Larry Malagar mipabuto og 32 puntos aron pangulohan ang Flores Cousins ngadto sa 94-90 nga kadaogan batok sa Team Jiclor sa 1st Amicis Basketball League (ABL) didto sa Consolacion Sports Complex.

Midugang si Jasper Macalam og 25 puntos, samtang si Tyron Conchas mitimbre og 16 puntos alang sa Flores Cousins ni playing coach Patrick Gregory 'Kurt' Flores ug team manager Boss D-Han nga mao karon ang temporaryong naghari sa 30-above category bitbit ang 2-0 nga baraha.

Ang Flores Cousins nabiyaan og siyete puntos, 19-26 sa sayong bahin sa aksiyon. Apan nakasikit kini sa halftime, 44-46 ug dayon mitagak og 31-20 nga bomba sa ikatulong kuwarter hinungdan sa pag-abante niini sa hingpit, 75-66.

Gibaraw dayon sa Flores Cousins ang pag-aksiyon og arangkada sa Jiclor sa naghinapos nga bahin sa duwa aron pag-eskapo uban ang kuwatro puntos nga kadaogan.

Si Elmer Malagar mipatuasik og 35 puntos, si Londe Malagar dunay 18 puntos, samtang sila si Raffy Dungog ug Butchoy Juntilla nagkumbinar og 27 puntos sa pilderong Jiclor.

Ang mga duwa sa labing unang ABL season ubos sa superbisyon ni commissioner Lee Mar Dahil inabagan ni technical committee chief Aurelio Eslawan.