TNT coach dismayado

CEBU, Philippines —  Dismayado si TNT KaTropa coach Bong Ravena sa gidangatan sa ilang kampanya sa PBA Governors' Cup, apan pabilin siyang positibo nga makabalik na gyud sila sa finals sunod season.

Ang KaTropa maoy usa sa labing init nga koponan sa regular season diin mitapos sila sa ikatulong dapit sa rekord nga 8-3. Apan nakawang kining tanan human sila gitaktak sa Meralco Bolts sa semifinals.

Daghan ang nagdahum nga ang TNT ang moabante sa finals ilabi na sa ilang ex-NBA standout import nga si KJ McDaniels, apan wala   misalir ang ilang kusog sa Bolts nga gitimonan sa beteranong coach nga si Norman Black.

Si Ravena nagkanayon nga bisan pa sa ilang kaparotan, adunay nakitang kalamboan sa ilang koponan ug gamiton nila nga leksiyon ang nahitabo karon nga season aron mas mokusog pa sa umaabot nga PBA season.

"May improvements naman," matud ni Ravena sa PBA.com."But it's a learning opportunity sa amin ito. We have to learn from this and later on, madadala namin ang experience na ito."

Ganado kaayo si Ravena sa sunod season tungod kay usa sila sa adunay labing lig-on nga line-up sa All-Filipino Cup tungod sa pagsud ni Fil-American Ray Parks Jr.