Kawhi nagbangis batok Spurs
CEBU, Philippines — Gikastigo ni reigning finals MVP Kawhi Leonard ang kanhi niya koponan nga San Antonio Spurs human kini gilampaso sa Los Angeles Clippers, 134-109, kagahapon San Antonio, Texas.
Si Leonard maoy sinaligan sa Spurs, apan mihawa kini niadtong miaging tungod tungod sa wala nila pagsinabtanay sa management.Taliwala sa mga pagbiay-biay ug ‘boo’ sa mga Spurs fan, si Leonard nagbangis kagahapon sa iyang 26 puntos, siyam ka assists ug pito ka rebounds.
Ang Los Angeles gibidahan usab nila ni bigman Montrezl Harrell ug Lou Williams nga pulos adunay 20 puntos, samtang si Paul George mitampo og 19. Ang Spurs nga padayong naglisud pagsulod sa eight seed sa West Conference gipangulohan ni DeMar DeRozan nga adunay 24 puntos, samtang si Marcio Belinelli adunay 17.
Sama sa Clippers, midaog usab sa balwarte sa ilang kaatbang ang Houston Rockets nga mipasawop sa Phoenix Suns, 139-125, didto sa Phoenix, Arizona.
Ang supertar nga si James Harden miratrat og 47 puntos, samtang si Russell Westbrook miiskor og 30 aron ihatud ang Rockets sa ika-10 nilang daog sud sa 13 ka duwa.
Sa ubang mga duwa, ang Brooklyn Nets mipatugpa sa Atlanta Hawks, 122-112, ang Chicago Bulls misungag sa Detroit Pistons, 119-107, ang Milwaukee Bucks mikastigo sa New York Knicks, 123-102 ug ang Utah Jazz miligis sa Charlotte Hornets, 114-107. – Lemuel P. Maglinte
KSB Iligan naghari, Cobras 3rd place sa Tagoloan
Gipahagba sa KSB Glass Iligan ang Team Unity, 99-95, aron langkaton ang kampiyonato sa Tagoloan Open Invitiational Basketball Tournament niadtong Sabado sa gabii didto sa 4,000-seater Tagoloan Dome sa Misamis Oriental.
Ang higanteng Cameroonian nga si Landry Sanjo maoy nangu sa KSB Glass uban ang 23 puntos.
“In a pocket tournament like this, it’s an advantage if you know your players well. Fortunately, we’ve been together for almost 10 years now,” matud pa ni KSB Iligan coach Chelito Marvin Caro kansang koponan mibulsa og P150,000 nga ganti. “But of course, the willingness and determination of my players also matter most for us in winning this championship.”
Sila si Wellmonz Muñoz ug Gio Jalalon nagkumboya og 25 puntos alang sa Iligan.
Nagparamdam sab si Jojo Tangkay nga mi-iskor lamang og 13 apan maoy gibayaw nga Most Valuable Player gumikan sa maanindot niyang salida sa tibuok nga bahin sa lima ka adlaw nga aksiyon.
Dako sab og natampo sila si Ferdinand Lusdoc, Hafer Mondragon ug Vincent Minguito aron tabangan ang KSB Glass nga maprotektahan ang 94-84 nilang bentaha sa nahibiling dos minutos sa duwa.
Sa gubat alang sa ikatulong dapit, ang reigning Cebu Schools Athletic Foundation, Inc. (CESAFI) champion Southwestern University (SWU)-Phinma Cobras mipiog sa Cebu Niños, 88-75, aron kabihon ang P75,000.
Sila si Sir Shaquille Imperial ug Senegalese center Lamine Thiam maoy mihatag og kahayag sa Cobras human mikadlit og 21 ug 18 puntos samtang sila si Allyn Dyll Roncal, Harvey Kent Sanchez, John Joseph Evardo ug Heider Bilao nagkumbinar og 27 puntos.
Mismo sila si Tagoloan Mayor Gomer “Enan” Sabio, sports-in-charge Van Halen Parmis ug tournament commissioner Atty. Audie Paduganan ang minutol sa mga tropeyo ug ganting salapi sa mga mananaog.
- Latest
