Bayaning surfer flag bearer sa Philippine team
CEBU, Philippines — Ang surfer nga si Roger Casugay maoy flag bearer sa Team Philippines sa closing ceremony sa Southeast Asian Games ugmang adlawa.
Si Casugay nasentro sa atensiyon sa SEA Games human sa bayanihon niyang buhat niadtong Biyernes dihang iyang giluwas ang kontra nga Indonesian nga hapit malunod atol sa ilang kompetisyon.
Gipabilib ni Casugay ang tanan sa SEA Games dihang gitalikdan niya ang dakong tsansa nga makasakmit sa gold medal aron lang maluwas ang kontrang atleta.
Si Casugay nakatilaw ra gihapon og gold sa misunod nga event niadtong Domingo nga mipasamot sa bilib ni SEA Games chef-de-mission William Ramirez.
Si Ramirez miingon nga sa kadaghan sa nakahatag og gold sa nasud, si Casugay ang mipakita sa tinuoray nga batasan sa maayong atleta.
"These Games are not only about medals," matud ni Ramirez. "It is about character, resilience, love for one another and shoring up the faith of the person next to you, something that Casugay has exemplified."
Dugang ni Ramirez nga gawas sa kuwarta nga iyang madawat isip gold medalist, madugangan ang incentive ni Casugay tungod sa iyang maayong nabuhat.
"I will include Roger in our awarding in Malacañang to meet the President," sumala pa ni Ramirez.
- Latest
