Monterroyo-Jordan Squad midaog batok LIFABA selection

MANILA, Philippines —  Wala usiki sa Monterroyo-Jordan team ang talagsaong kahigayonan ug nagmadaugon  kini  atol sa usa ka exhibition game niadtong Huwebes didto sa KAI gym sa Liloan.

Ang Monterroyo-Jordan nga maoy nirepresentar sa LABA (Los Amigos Basketball Association) mipilde sa LIFABA (Liloan Forty Above Basketball Association) sa iskor nga 81-78.

Si Joshua Yu mipakitang gilas ug maoy nangulo sa unom ka Monterroyo-Jordan players nga miiskor og double figures pinaagi sa iyang 15 puntos.

Usa sa mga team managers nga si Richard Jordan, mipaksit og upat ka tres alang sa iyang 12 puntos, samtang sila si Tawing Grafe, Canjo Echavez, Daniel Catinoy ug Marlon Mendoza nagtampohay og 10 puntos alang sa Monterroyo-Jordan.

Sila lang si Jay Abella ug Roy Ermac ang mihimo'g double figures performance sa LIFABA nga nagkumbinar og 27 puntos. Si Abella mipugnit og 14 puntos, samtang si Ermac mipupo'g 13 puntos sa host team LIFABA.

Labaw unta ang LIFABA sa first period, 23-18, apan ang sayo nilang pagpanginit gitugbangan og kabugnaw hinungdan nga nailog sa Monterroyo-Jordan ang momentum sa second quarter, 37-34.

Wala na makarekober pa ang LIFABA sukad niadto kay ang Monterroyo-Jordan  mipahaguros og mga puntos sa pagpangulo nilang Jordan ug Yu.

Miaksiyon og gukod ang LIFABA sa katapusang kuwarter, apan bisan giunsa nila og diskarte wala gyud nila makawat ang daog kay naapsan sila sa oras.

PUNTOS MATAG USA

MONTERROYO-JORDAN (81) – Yu 15, Jordan 12, Grafe 10, Canjo 10, Mendoza 10, Catinoy 10, Tañan 6, Monterroyo 3, Armero 2, BJ 2.

 LIFABA (78) – J. Abella 14, R. Ermac 13, John 8, Chavez 8, B. Noval 7, Coach Tata 7, Lacio 6, Archie 6, Sungahid 5.