UC hari na usab sa CCO
CEBU, Philippines — Pabilin sa ilang trono ang University of Cebu isip hari sa secondary division sa 29th Cebu City Olympics, samtang ang Unit 1 maoy midominar sa elementary level kagahapon didto sa Cebu City Sports Center.
Ang UC misakiyo og 78 ka golds, 66 silvers ug 50 bronze medals. Nagsunod kanila ang Abellana National School nga adunay 36-18-20 gold-silver-bronze, samtang ang University of San Carlos maoy ikatulo sa overall standing sa ilang 35-45-29 medals.
Mihatud sa katapusang gold medals sa UC kagahapon ang ilang taekwondo team sa pagpangulo nila ni bantam Roydan Ranile, featherweight Christine Villasor, lightweight Martha dela Victoria, openweight Sophia Alexandra Labra ug welterweight Job Caneda, samtang mibida usab ilang mga karatekas sama nila ni Precious Belicario, Liz Salon ug Christine Tautho.
Mihatud usab og gold medals sa UC ang ilang arnis team, samtang gipilde sa ilang volleyball boys ang University of San Jose-Recoletos, 25-23,25-15,11-25, 25-18.
Nakabawi hinuon ang USJ-R sa girls division dihang ilang gilatos ang USC,25-21,25-17,23-25, 25-16.
Ang Abellanians, sa ilang bahin, misidlak sa arnis, sepak takraw ug billiards.
Sa elementary level, ang Unit 1 mihakot og 31 ka golds, 32 ka silvers ug 31 ka bronze medals gisundan sa UC nga adunay 20-10-4 gold-silver-bronze, samtang ikatulo ang Unit VII sa ilang 19-12-15 gold-silver-bronze medals.
- Latest
