Irving, russell pulos injured

CEBU, Philippines — Parehong nangayayay ang duha ka bitoon sa NBA nga sila si Kyrie Irving sa Brooklyn Nets ug si D’Angelo Russell sa Golden State Warriors.

Si Irving wala makapakitag aksiyon sa ilang duwa batok sa Chicago Bulls kagahapon adlawa gumikan kay duna kini injury sa iyang abaga.

Si Irving mihipos og 17 puntos ug siyam ka assists sa ilang sangka batok sa Denver Nuggets niadtong Biyernes diin siya gilista nga kuwestiyonable sa wala pa ang duwa.

Mao kini ang labing unang higayon nga nakapalta og duwa si Irving karong season diin siya ikaunom sa pinuntosay uban ang average nga 28.5 puntos matag duwa.

Sa laing bahin, si Russell dili makaduwa sud sa duha ka semana gumikan kay na-angol ang tuong kumagko.

Nahiaguman ni Russell ang maong injury atol sa 105-100 nilang kaparotan ngadto sa Boston Celtics niadtong Sabado.

Sa nahitabo ni Russell, daw sa gibiay-biayan gyud sa dili maayong palad ang Warriors, nga napiangan nang daan gumikan kay ang sinaligan nilang “Splash Brothers” nga sila si Stephen Curry ug Klay Thompson pulos injured.

Ang Warriors, nga gikan sa unom ka sagunson nga pilde, mao karon ang nagkupot sa labing bati nga 2-11 record sa liga.—Emmanuel B. Villaruel nuel B. Villaruel

6 ka golds laraw sa Phl athletics team

Nakita ni Philippine Athletics Track and Field Association president Philip Juico nga makabingwit og di momenus sa unom ka gold medals ang athletics team sa nasud sa nagsingabot nga 39th Southeast Asian Games karong Nobiyembre 30 didto sa New Clark City sa Tarlac.

Duha sa mga sayung gitan-aw ni Juico nga makahatod og golds sa nasud sila si Harry Diones ug Aries Toledo. Si Diones ang labing kusug nga pambato sa nasud sa triple jump, samtang si Toledo usa sa gold medal contender sa decathlon.

“We urge them to go for it. Ibigay na ang lahat for our country,” matud pa niya sa The Philippine STAR.

Laing mga gilauman nga maka-gold alang sa nasud mao si Cebuana marathoner Mary Joy Tabal, pole vaulter Ernest John Obiena ug Natalie Uy, 800-meter specialist Carter Lilly, hurdles champ Eric Cray, sprinter Kristina Knott ug shot-putter nga si William Morrison. —Lemuel P. Maglinte

SMB players diriyot garambol

Nagkainitay ug nagtinukmuray nga diriyot miresulta sa sukmagay ang upat ka players sa San Miguel Beermen atol sa ilang team practice kagahapon didto sa Upper Deck Gym sa Pasig.

Giingon nga nalambigit sa maong kagubot si San Miguel forward Arwind Santos, import Dez Wells, Ronald Tubid ug Kelly Nabong.

Sa taho sa Sports5, gasugod ang lamok-lamok dihang gidasmagan ni Santos ilang import atol sa usa ka play, wa kauyon si Wells sa pagbangga kaniya sa PBA All-Star ug iya kining gikompronta. Dali usab nga mihasmag si Ronald Tubid aron labanan si Santos, apan miresbak usab ang Fil-American nga si Kelly Nabong alang ni Wells.

Dali hinuon nga nauwang sa kauban nilang mga players ug coaches ang mga nalambigit nga Beermen ug gipaabot nga tigumon ang upat aron magkauliay sa maayong relasyon.

Si Santos midepensa nga igo lang siya mihimo og screen, apan wala makauyon si Wells tungod sa kusug nga pagdasmag kaniya. Si Wells aduna pay gihambin nga injury sa tiil, apan hinay-hinay na kini nga mibalik sa praktis ilabi na nga nagkaduol na ang playoffs sa Governors Cup.

Ang Beermen may kahigayunan nga mohirit sa twice-to-beat advantage kung mudaog batok TNT KaTropa karong Miyerkules nga mao usab ang ilang katapusang duwa sa Govs Cup elimination.