NBTC League North kasado na

CEBU, Philippines — Andam na ang tanan alang sa Northern Cebu leg sa 1st Chooks To Go NBTC League nga gipresenta sa SM nga mosikad karong Nobiembre 8 didto sa D.M. Reynes Gymnasium sa Compostela, Cebu.

Ang lima ka adlaw nga torneyo nga matapos karong Nobiembre 17 naka-agni og 16 ka teams.

Kini mao ang Formative Academic & Skills Development School, La Consolacion College - Liloan, Britech College, Inc., Compostela National High School, Saint Louisse Academy, Inc., Liloan National High School Extension-Don Bosco Campus, Schildknecht School, Inc, GreenRose Centre for Academe, Inc, Rosemont Hills Montessori College, Inc., ug Arcelo Memorial National High School (evening class).

Mopakita sab og aksiyon ang Cabangahan National High School, Santa Cruz Learning Center, Liloan National High School, Carmen National High School (Day), Lataban National High School, ug Arcelo Memorial National High School (day class).

Gibahin sila sa upat ka grupo nga moduwa ubos sa single round robin format. Ang top 2 seeds matag grupo moabante sa quarterfinals diin bahinon na sab sila sa duha ka grupo nga langkoban og tag-upat ka miymebro. Ang top 2 matag grupo motikang crossover semifinals diin ang mga mananaog maoy mag-abot sa kampiyonato.

Ang makampiyon maoy morepresentar sa Northern Cebu sa SM NBTC League Regional Finals.

Gipaluyohan sa Compostela LGU ubos sa liderato ni mayor Froilan Quino, ang mga duwa ubos sa superbisyon ni NBTC North commissioner Ruben Nelmida Patotoy, Jr.