Leonard mipukan kanhi niya niya team

CEBU, Philippines — Mikadlit og 38 puntos si Kawhi Leonard, samtang si Montrezl Harrell mipaksit og 24 puntos sa dihang gitunolan sa Los Angeles Clippers ang San Antonio Spurs sa labing una niining pilde, 103-97 ning nagpadayon nga NBA season kagahapon didto sa Staples Center sa Los Angeles, California.

Ang two-time Finals MVP nga tuyo gipapahuway sa miagi nilang duwa batok sa Utah Jazz niadtong Huwebes, milangkat sab og 12 ka rebounds alang sa labing una niyang double-double karon nga season.

Sikit kaayo ang kumbati sa duha ka kampo sa nag-unang 28 minutos sa aksiyon, apan ang Clippers mipabuto og 9-1 aron  pagkontrolar sa duwa sa nahibiling 6:55 sa ikatulong kuwarter.

Igo lamang nakasikit ang Spurs ngadto sa singko puntos, 75-80, gumikan kay ang Clippers miiskor og 11 sa nag-unang 13 puntos sa katapusang kuwarter aron pagtikyaubon ang ilang mga bisita gikan sa San Antonio.

Si DeMar DeRozan, lumad nga taga Los Angeles, maoy nangu sa Spurs uban ang 29 puntos.

Sa laing sangka, si Jahlil Okafor miiskor og 26 puntos, samtang si Brandon Ingram mitali og 25 puntos alang sa New Orleans Pelicans nga milubong sa Denver Nuggets, 122-107 alang sa labing una nilang daog sud sa lima ka duwa.

Nagpakitang gilas sab si Jrue Holiday  nga mipupo og 19 puntos ug pito ka assists ug ingon man si Frank Jackson nga mihipos og 21 puntos human mipasud og walo sa 10 niya ka itsa alang sa Pelicans.

Mikuha sab og atensiyon si Kendrick Nunn nga mipatuasik og career-high 28 puntos alang sa   Miami Heat nga mipakaging sa Atlanta Hawks, 106-97  sa ikaduhang higayon sud lamang sa tulo ka adlaw.

Si Jabari Parker maoy nangu sa pilderong Hawks uban ang 23 puntos.