Giannis nag-wild

Cebu, Philippines — Mihimo'g 'triple-double' si Giannis Antetokounmpo  alang sa  Milwaukee Bucks nga mipahagsa sa Houston Rockets,  117-111 sa ilang NBA season-opener kagahapon didto sa Toyota Center sa Houston, Texas.

Gawas niini, gibaraw sab ni Antetokounmpo ang reunion nilang James Harden ug Russell Westbrook ning higayona sul-ot ang uniporme sa Rockets. Ang duha ka superstars kanhi nag-uban sa Oklahoma City Thunder.

Sa engkuwentro nga naglangkob sa katapusang tulo ka MVP sa liga, si Antetokounmpo maoy mipatigbabaw.

Ang gibansagan nga 'Greek Freak' mibahog og 30 puntos, uban ang 13 ka rebounds ug 11 ka assists. Miiskor siya og 20 puntos sa second half aron tabangan ang Bucks nga makabangon human malubong og 16 puntos sa ikatulong kuwarter.

Gumikan sa iyang pagmangtas, si Antetokounmpo nahimong labing unang player sukad ni Oscar Robertson niadtong 1966 nga miposte og 30 puntos sa iyang triple-double sa usa ka season-opening game.

Apan si Antetokounmpo miingon nga dili siya kondili ang ilang teamwork maoy nahimong yawi sa ilang kadaogan.

"We stayed together," matud pa ni Antetokounmpo. "Even though we faced adversity and we weren't playing our best basketball in the first quarter and second quarter we came out, we were focused. We were able to move the ball and execute."

Si Westbrook maoy nangu sa Rockets uban ang 24 puntos, 16 ka rebounds ug pito ka assists. Si Harden wa'y sipyat sa 14 niini ka free throws hinungdan nga nakamaneho pagtali og 19 puntos bisan og duha lamang sa 13 niini ka itsa ang iyang napasulod.