Cobras batok Jaguars
CEBU, Philippines – Ang Southwestern University (SWU)-Phinma Cobras ug ang University of San Jose-Recoletos (USJ-R) Jaguars parehong naglaraw nga mobangon gikan sa sunod-sunod nga kaparotan, apan usa kanila ang motiyabaw gumikan kay sila man maoy magbangga sa 19th Cebu Schools Athletic Foundation, Inc. (CESAFI) karong adlawa diha sa Cebu Coliseum.
Human sa impresibong 3-0 nga sugod, ang Cobras gipatiurok sa three-time defending champion University of the Visayas(UV) Green Lancers, 66-71 niadtong Septiyembre 26.
Daw sa nabungog pa ang Cobras gikan sa maong kapildihan gumikan kay gipakuratan sab sila sa Cebu Institute of Technology-University (CIT-U) Wildcats sa iskor nga 62-67.
Gikan sa duha ka sunod-sunod nga pilde, ang Cobras nanghinaut nga tak-upon ang ilang kampanya sa unang hugna pinaagi sa daog aron makigduyog sila sa 4-2 nga University of San Carlos (USC) Warriors sa ikaduhang dapit sa seniors division standings.
Ang Cobras makigtigi batok sa Jaguars nga misukarap sa upat ka sunod-sunod nga higayon.
Sa dili pa makigharong ang Cobras batok sa Jaguars sa alas-6:45 sa gabii, ang UV Baby Lancers makigsangka sa Cebu Eastern College (CEC) Dragons sa alas-5:15 sa hapon.
- Latest
