Baby Webmasters 5-0 na
CEBU, Philippines — Ang University of Cebu (UC) Baby Webmaters nakasugakod sa malisud nga hagit sa University of Southern Philippines Foundation (USPF) Baby Panthers tibuok duwa aron pagposte niini og 56-51 nga daog ug pagpabiling way pilde sa 19th Cebu Schools Athletics Foundation, Inc. (CESAFI) men's basketball tournament sa Cebu Coliseum kagahapon.
Sila si Luther Gabriel Leonard ug King Balaga nagkumbinar og 23 puntos alang sa Baby Webmasters nga mipahugot sa ilang pagkupot sa solong liderato sa juniors division bitbit ang 5-0 record.
Sikit kaayo ang kumbati sa duha ka kampo kay bisan ang Baby Webmasters nakalabaw og otso puntos, ang Baby Panthers mitubag pinaagi sa nagkayong 10-2 aron tablahon ang iskor, 47-47.
Apan mao na diay kadto ang katapusang utong sa USPF gumikan kay ang Baby Webmasters milusad og 9-2 run aron sa hingpit niining pagbulsa sa ikalima nilang sagunson nga daog bitbit sng 56-49 nga labaw sa nahibiling 1:04 sa duwa.
Si Kyle Ochavo dunay 14 puntos apan nahoyhoy ang abaga kay ang Baby Panthers nakatilaw sa ikaduha nilang pilde sud sa lima ka duwa.
Sa sayo pa, si Nathaniel Montecillo mikadlit og 17 puntos samtang sila si Joshua Baruc ug Jaed Buzon parehong mi-iskor og 16 sa dihang gipayaka sa University of San Carlos (USC) Baby Warriors ang Southwestern University (SWU)-Phinma Baby Cobras, 76-69. Ang Baby Warriors nagtabla na karon og ang ilang biktima uban ang managsamang 2-3 nga baraha.
- Latest
