Cobras mobangon

CEBU, Philippines – Ang Southwestern University (SWU)-Phinma Cobras mosuway og bangon sa miagi nilang kapildihan batok sa three-time defending champion University of the Visayas (UV) Green Lancers sa dihang ilang sangkaon ang Cebu Institute of Technology-University (CIT-U) Wildcats sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Naputol ang tulo ka sagunson nga daog sa Phinma Cobras human sila giparot sa Green Lancers, 66-71 niadtong Huwebes sa gabii.

Samtang ang Cobras nga natagak sa ikaduhang dapit uban ang 3-1 record, ang Lancers miangkon sa solong liderato sa seniors division bitbit ang 4-1 nga baraha.

Nanghinaut hinuon ang Cobras nga makabawi dayon sa ilang pakigbugno sa Wildcats karong alas-3:30 sa hapon.

Inilog kaayo ang Cobras batok sa Wildcats nga naglungot-lungot nga pakgangon ang upat ka sunod-sunod nilang pilde.

Sa laing duwa sa collegiate division, ang University of Southern Philippines Foundation (USPF) Panthers naglaraw nga inaton ang 2-2 nilang marka, samtang ang University of San Jose-Recoletos (USJ-R) Jaguars buot nga moputol sa tulo ka sagunson nilang pilde sa ilang bugno sa alas-5 sa hapon.

Sa juniors division, ang University of Cebu (UC) Baby Webmasters nagtinguha nga mokadlit sa ikalima nilang sagunson nga daog sa dihang ilang hamagon ang 3-1 USPF Baby Panthers sa alas-2 sa hapon, samtang ang 2-2 SWU-Phinma Baby Cobras makigtakus sa 1-3 University of San Carlos (USC) Baby Warriors sa alas-12:30 sa udto.