Carter mipatik og kasaysayan

CEBU, Philippines — Si Vince Carter mipatik og kasaysayan sa NBA human kini mipirma og kontrata uban sa Atlanta Hawks kagahapon.

Gumikan niini, ang 42-anyos nga si Carter  mahimo nga labing unang NBA player nga moduwa sa liga sud sa 22 ka seasons.

Dugang niini, ang beteranong swingman molugwa sab nga labing unang player nga makapakita'g aksiyon sa liga sud sa upat ka managlahing dekada.

Sa aktibong mga NBA players, si Carter maoy nangu uban sa 1,481 ka duwa nga iyang naapilan. Ikatulo sab siya sa listahan sa labing daghan nga nasud nga 3-pointers sunod nilang Stephen Curry sa Golden State Warriors ug Kyle Korver sa Milwaukee Bucks.

Si Carter maoy 1999 NBA Rookie of the Year uban sa Toronto Raptors nga mikuha kaniyang No. 5 pick sa 1998 NBA Draft. Nasakop siya sa NBA All-Star sud sa pito ka sagunson nga tuig niadtong 2000 ngadto sa 2007.

Gibansagan og "Air Canada" gumikan sa kataas sa iyang layat nga kanunay moresulta ngadto sa makalisang nga dunks, gitabangan ni Carter ang Team USA nga makadaog og gold medal niadtong 2000 Sydney Olympics.

Sa kinatibuk-an sa iyang karera uban sa Atlanta, Toronto, New Jersey, Orlando, Phoenix, Dallas, Memphis ug Sacramento, si Carter mi-average og 17.2 points, 4.4 rebounds, 3.2 assists ug 1.0 steals matag duwa.

Ang lain pang NBA players nga nakaduwa sud sa 21 ka tuig mao sila si Robert Parish, Kevin Garnett, Kevin Willis ug Dirk Nowitzki.