SWU,USC magbugno sa solong liderato
CEBU, Philippines — Parehong naglaraw ang Southwestern University (SWU)-Phinma Cobras ug ang University of San Carlos (USC) Warriors nga magsolo sa liderato sa seniors division sa ilang panag-abot karong adlawa sa 19th Cebu Schools Athletic Foundation, Inc. (CESAFI) men's basketball tournament diha sa Cebu Coliseum.
Ang Southwestern U mihaw-as gikan sa duha ka sagunson nga daog batok sa University of Cebu (UC) Webmasters, 66-58 ug University of Southern Philippines Foundation (USPF) Panthers, 86-66. Apan ang Warriors nagsikit kanila bitbit ang 3-1 nga baraha.
Human gilampurnas sa three-time defending champion University of the Visayas (UV) Green Lancers, 74-53 niadtong Septiyembre 12, ang Warriors namawi pinaagi sa duha ka sunod-sunod nga daog batok sa University of San Jose-Recoletos (USJ-R) Jaguars, 63-55 ug Cebu Institute of Technology-University (CIT-U) Wildcats, 81-74.
Ang Warriors makigtigi sa Cobras sa alas-3:30 sa hapon sa dili pa magsangka ang UC Webmasters ug USJ-R Jaguars sa alas-5 sa hapon.
Ang Webmasters ug Jaguars pulos nagtinguha nga mokadlit sa ikaduha nilang daog.
Sa juniors division, ang UC Junior Webmasters mosuway og inat sa wa'y pilde nilang rekord ngadto sa 3-0 sa ilang pakigharong sa CIT-U Baby Wildcats (0-2) sa alas-2 sa hapon, samtang ang Sacred Heart School-Ateneo de Cebu (SHS-AdC) Magis Eagles nanghinaut nga modimdim sa katam-is sa kadaogan sa dihang ilang hamagon ang Don Bosco Greywolves sa pasiunang duwa sa alas-12:30 sa udto.
- Latest
